top of page
【彼女警告：唔好再𥄫女﹗】
彼氏作為一個正宗毒L，平日除左返工放工、打機、同兄弟打機，就係同彼女出到街。不過出街並唔係重點，最大嘅興趣係「𥄫女」！
雖然彼女自己都會以欣賞眼光睇吓啲靚女，但係男人又點會識用欣賞嘅眼光呢，除非係三哥咁靚仔先會例外，其他男人統統都係猥瑣！
記得有一次除夕，彼女例牌跟彼氏同班兄弟去倒數。食飽飯就轉場去飲吓嘢啦，咁除夕流流，正常港女都會著得戰鬥格啲，單身嘅趁機埋埋單吖嘛。大家飲到 high high 地之際，彼氏竟然同我講：「bb 你望吓，嗰邊短頭髮著背心短裙條女仲大波過你啊～」彼女即刻醒晒，雖然嬲到發癲，但係仲有一絲理性，唔會喺兄弟面前落彼氏面。
到咗第二朝，彼氏嘅死期到喇～ 好明顯佢貓到對前一晚發生嘅事無晒印象，彼女咪慢慢引導吓佢囉！「bb 你記唔記得尋晚有個短頭髮著背心短裙嘅靚女啊？」彼氏一臉茫然，彼女唯有再比多少少提示啦「呢～ 你話人地大波過我嗰個啊，死仔！仲要話比我聽？」彼氏即刻清醒晒，知道自己犯咗彌天大罪！梗係啦，𥄫女𥄫到同自己女朋友分享真係第一次見。
後來足足花咗七七四十九日先𠱁得返彼女，仲要永久守行為！
可惜對眼生喺彼氏度，而且有多年𥄫女經驗，彼女喺電光火石之間實在阻止唔到；但係睇住嚟啦，終有一日我會捉到你㗎，到時你就知味道！
彼女
十一月廿四日
bottom of page