【一句講哂：姊妹=女人=累人！】

唔知你哋女朋友嘅姊妹係點， 彼女嘅姊妹嚟講， 一個字， 累人、靠害！

 

彼氏細細個就深深明白一個道理：姊妹講一句，勝過自己講十句。所以，一直以來都當彼女嘅姊妹是策略性友好伙伴看待，絕對唔會得失任何一位姊妹。

 

自問自己每次見到彼女嘅姊妹都有保持良好形象。喺呢一兩年嘅時間，請食飯、做 Shopping 跟班、義務搬運工，都算做到足。原本以為做好呢啲表面功夫，班姊妹就會喺我有事嘅時候，幫我講兩句好說話。誰不知班女人都算好嘢，唔幫我不特止，重要跣我幾鑊。

 

有一日，彼女拎左我部手機，話幫我set D 嘢。彼女協助彼氏開啟 Find My Friends 功能，等彼女可以全天候監視彼氏嘅位置，免被不法之徒綁架。追問之下，當然就係班好姊妹嘅建議啦。自此之後，彼氏覺得每次出街都好有安全感。

 

之後有一次，彼氏同班兄弟出去食飯，咁啱電話收得唔好，有個幾鐘冇同彼女聯絡。彼氏知道嗰一刻大檸樂了，但係最大鑊嘅唔係彼女搵我唔到，而係佢即時同佢班姊妹講。班好姊妹當然有即刻幫我講好說話啦。

 

真實對白：

彼女「你去咗邊？」

彼氏「食飯囉，啱啱原來收得一格。」

彼女「姊妹話你係去咗地庫嗰間 Bar 飲嘢 wo～」

彼氏「⋯⋯⋯⋯⋯」

 

自此之後，彼氏決定要遠離嗰班靠害姊妹。彼女再叫我同佢班姊妹一齊食飯？不了，要返工。

 

P.S. 彼女接受咗姊妹嘅建議後，彼氏間中都會收到關心嘅 Message⋯⋯ 真係好幸福啊！