【彼氏點睇 — 購物之達人】

你哋係咪唔明點解女人咁鍾意買嘢？

女人鍾意買嘢，其實好正常，但係自從同左彼女一齊之後就發現，女人買野唔係男人所諗嘅咁簡單。

 

起初我以為女人都係鍾意買吓衫褲鞋襪，原來唔L係。

單係講買衫，首先要分季節性，轉夏季要買短裙、背心、涼鞋；冬天就要買大褸、毛毛鞋、冷衫。同款唔同色可以再買，同色但個款差粒鈕或者拉鍊又可以再買。

 

化妝品先大鑊。粉底、眼線筆、睫毛液、唇膏……（下刪二十種）。以唇膏為例，保守估計彼女應該唔多過四十枝。但係最神奇嘅係，彼女每次經過鋪頭都會話「我枝乜乜乜就用晒喇……」

 

不過，大家仔細啲諗，女人買親嘅嘢，好似衫同鞋咁，都係大家好易會留意到嘅。相反， 男人買嘅嘢好多時就收收埋埋。

 

男人買嘢嘅瘋狂程度有時仲勁過女人。有啲男人鍾意儲高達、模型車、Figure、波鞋，買親都千千聲萬萬聲。彼氏我作為一個毒男每個月其實都會買新 Game 玩。有時又會買吓樂器、 換吓電腦，遲啲仲想買架車…… 所以計下條數，自己洗錢分分鐘狼過彼女……

 

所以，都係唔諗咁多了，用吓部新 Macbook 先：）